Самыя адважныя, чароўныя, таленавітыя і сэксапільныя прыгажуні вырашылі паспрабаваць свае сілы на беларускім папярэднім кастынгу "Хачу ў ВІА ГРУ!". Арганізатарам мерапрыемства ад беларускага боку выступіў тэлеканал ОНТ.
З самай раніцы інтэр'еры Нацыянальнай школы прыгажосці Беларусі напоўніліся прыгожа апранутымі дзяўчынамі.
Для кожнай прэтэндэнткі на запаветнае месца салісткі папулярнай жаночай групы "ВІА ГРА" працэс адбору пачаўся з папярэдняй гутаркі і праслухоўвання.
Затым дзяўчынам, якія спадабаліся арганізатарам кастынгу, прапанавалі запоўніць анкеты. Дарэчы, многія ўдзельніцы, паставіліся да менавіта гэтага этапу вельмі скрупулёзна, што перыядычна выклікала незадаволеныя воклічы: "Дзяўчыны, Вы ж не сачыненне "Як я правёў лета ў вёсцы" пішыце!". Самым складаным для беларусак апынулася пытанне, звязанае з курсам канверсіі ўкраінскіх грывень у долары.
на фота: для таго, каб запоўніць анкету, стол неабавязковы:)
Пасля паспяховага запаўнення анкеты прыгажуні рэгістраваліся, атрымлівалі таблічку са сваім нумарам, акуратна прыляплялі яе да свайго адзення (ледзь ніжэй бюста) і удзельнічалі ў фотасесіі.
Тыя, хто не здолеў пераканаць арганізатараў "Хачу ў ВІА ГРУ!" у сваёй прыгажосці і таленавітасці, у засмучаных пачуццях пакідалі пляцоўку кастынгу. І тут без слёз не абыйшлося...
на фота: зусім юная дзяўчына, якая не прайшла кастынг, знервавалася...
Але самы жорсткі этап адбору чакаў удзельніц кастынгу пасля фотасесіі. Гутарку з псіхолагам у зачыненым пакоі паспяхова прайшлі не ўсе дзяўчыны. Удзельніц кастынгу прасілі зняць абутак, выканаць песню і танец. Некаторым прыгажуням прапанавалі распрануцца. Прамыя пытанні і каментары, датычныя асабістага жыцця, знешнасці прыводзілі некаторых дзяўчын у стан поўнага ступару. Усе інтэрв'ю фіксаваліся відэакамерамі.
на фота: гутарка з удзельніцай кастынгу ў зачыненым пакоі
