Прыходзiць Алёнка i мучае:
— Чаму агуркі калючыя?
Чаму люстэрка бліскучае?
Чаму парфума пахучая,
А госці прыходзяць кучаю?
Чаму такая трындзючая
Ў навінах тэлевядучая,
А мамка на татку злючая,
Як посуд мые анучаю?
Чаму казюрка паўзучая?
Чаму крапіва пякучая?
А дзверы — такія рыпучыя?
А ўколы — такія балючыя?
Чаму агуркі калючыя?
— Таму што ты даставучая!
аўтар слоў песні "Чаму?": Андрэй Хадановіч